أحمد العوضي: ياسمين هي الممثلة الأقرب لقلبي

كشف الفنان أحمد العوضي السبب وراء تعاونه الثالث مع زوجته النجمة ياسمين عبد العزيز في موسم رمضان 2023، مؤكداً أنها الممثلة الأقرب إلى قلبه، والتي يشعر معها بوجود ترابط وطيد، حيث أشار إيضا إلى احتمالية تعاونهما قريباً في السينما، مؤكداً أن هذه الخطوة ستتم بعد انتهاء ياسمين من تصوير فيلم جديد تعاقدت عليه بالفعل، كما سيقدم هو بطولة فيلم آخر مع المخرج طارق العريان.
وصرح أحمد العوضي، خلال أحد لقاءاته: "احنا بنحب نشتغل مع بعض، أنا بحب اشتغل مع ياسمين، ياسمين بتحب تشتغل مع عوضي، الكيميا بينا حلوة، الشغل بينا مريح".
وتابع: "انا ببقى شايل هم ياسمين زي ما ببقى شايل همي، وهي بتبقى شايلة همي برضو وبنتبادل الاهتمام بأمور بعض"، مضيفا: "لما بشتغل مع حد تاني مش بيبقى بنفس الحميمية حتى لو هو حبيبي أو أخويا أو اختي أو زميلتي عمرها ما هتبقى بنفس الحميمية بين اتنين متجوزين".
واستكمل قائلا: "لما عملنا مسلسل اللي مالوش كبير مع بعض ربنا رزقنا ونجح وطلعنا في برنامج منى الشاذلي ونجحنا، والناس حابة الموضوع وبتحبنا مع بعض ولازم الناس تبقى حابة الاتنين مع بعض عشان نقدر نعمل مسلسل".
وعن تصريحه بخصوص تقديم فيلم سينمائي يجمعهم، أوضح العوضي: "ممكن نعمل فيلم بس مش دلوقتي، لأن ياسمين عندها فيلم هتعمله بعد العيد، وأنا عندي فيلم البلدوزر مع طارق العريان ودي خطة مؤجلة".
وحول مسلسلهما الجديد "ضرب نار" قال العوضي: "احنا بنعمل مسلسل بيحترم المشاهد ومش بنعمل حاجة لا تليق بالجمهور وبيبقى في ثقة بينا وبين الجمهور.
وعن قصة المسلسل أوضح العوضي: "العلاقة بين مهرة وجابر علاقة حقيقية بتحصل فيها التقلبات بين الناس الحقيقة بتاعت واحد بيحب واحدة وعليك ضغط"، مضيفا: "احنا لازم ننجح زي مسلسل اللي مالوش كبير، بس زي ما نجحنا مع بعض في اللي مالوش كبير فمينفعش نكرر نفسنا بنفس الطريقة، لازم اختلاف".

أبطال مسلسل «ضرب نار»

مسلسل «ضرب نار» بطولة ياسمين عبدالعزيز، أحمد العوضي، سهير المرشدى، هدى الأتربى، إيمان السيد، بدرية طلبة، تامر نبيل، أحمد عبدالله محمود، تيسير عبدالعزيز، ومن تأليف ناصر عبدالرحمن وإخراج مصطفى فكرى.
من المقرر أن يعرض مسلسل «ضرب نار»، عبر شاشة قناة ON E الفضائية، وON دراما، ومنصة وwatch it الرقمية، وقناة أبوظبي الفضائية، بالإضافة إلي قناة Art الفضائية.