نيللي كريم: “لما بتفرج على حواراتي القديمة بحسها هبلة أوي”

قالت الفنانة نيللي كريم، إن تجربتها في مسلسل “ضد الكسر” كانت لأول مرة تقوم بدور السيدة القوية طوال الوقت، حيث إنها ليس لها مشاعر أحيانا.

وأضافت، خلال لقائها ببرنامج “يوم ليك”، عبر قناة الحياة: “قلبي جمد في الحياة، وبنسبة كبيرة بطلت أعيط ومش حساسة زيادة عن اللزوم، وأصبحت أكثر هدوءًا في المواقف، أنا قليلة الكلام عموما وفي البرامج مكنتش واخدة راحتي وكنت بجاوب على قد السؤال، ساعات بتفرج على حواراتي القديمة هبلة أوي بس بتفرج بابتسامة لأني في المرحلة دي كنت كده وكل حاجة ولا وقتها ومكانها”.

وتابعت: “دخلت التمثيل من خلال الفوازير حلم ولا علم سنة 2000، ودخلت التجربة عشان كنت بحب الرقص والغناء كان أدائي على مقدار الفزورة، ومفيش بنت في مصر مكانتش بتحب نيللي وشريهان، ولما اتعرض عليا أعمل فوازير اتبسطت ولما دخلت التجربة الموضوع صعب جدا، وخصوصا إني كان عمري ما مثلت، وكنت داخلة أعمل التجربة وكنت مبسوطة”.

وذكرت أنها أدت دورها في “وجه القمر” مع فاتن حمامة، وكانت تهتم وقتها بالأوبرا، وكل شيء جاء بوقت تلقائي.

واستكملت: “فيلم واحد صفر كان الفيلم واقعي، وبعده فيلم 678، وبدأت أخد خبرة أكتر، واتعرف على كتاب وممثلين والسينما بتاعتنا، لأني عشت 10 سنين من عمري في روسيا، ومعرفتي بالأفلام والثقافة في مصر كانت من خلال أفلام الأبيض والأسود”.