تامر حسني لـ “حلا”: انتي صورتيه ومثلتيه بنفسك وبمنتهى الرضا

نفى الفنان تامر حسنى، كل الاتهامات التي وجهتها له الفنانة حلا شيحة، بشدة بعد  مشاركتها في أحدث أفلامه “مش أنا”.

وقال تامر حسني : “إن كل ما حدث كان بالاتفاق بينهما ولم يجبرها أحد على ذلك، وتقاضت أجرا كبيرًا على عملها بالفيلم، بل بالعكس هي من كانت تتهرب من الرد على تليفوناته من أجل التحضيرات الأخيرة للفيلم”.

ونشر تامر حسني، بيانًا إعلاميًا، للتوضيح عبر حسابه الرسمى على “فيسبوك” قال فيه: “نهاركم جميل يا أغلى الناس، الحقيقة عمري ما بتخيل إني أدخل في نقاش بالشكل دا مع زميل بحترمه وكان في بينا كل خير، للتوضيح بما إنك يا حلا كتبتى بوست وأشركتى الجمهور الكريم معانا بدل ما كنتي تكلميني شخصياً ونتناقش بينى وبينك، فأنا مضطر أرد هنا برضو، أولاً أنا عمرى ما وعدتك إن الكليب مش هينزل دا محصلش أصلاً يا حلا مش أنا خالص اللي أوعد وأخلف”.

وأكمل : “الحقيقة إني احترمت كلامي معاكي ووعدتك أشيل مشاهد تانية طلبتيها وشيلتها بالفعل وشكرتينى عليها ولو حابه تفتكرى المشاهد اللي اتشالت بعد أذنك روحي شوفيها في المونتاچ عند الأستاذ عمرو عاكف أو كلميه يبعتهالك كلها موجودة، وبعدين الفيلم بقالة 3 أسابيع في السينمات والكليب موجود جوة الفيلم هو بالنسبالك الحرام إننا ننزل الكليب على اليوتيوب بس! إنما الكليب يتشاف جوه السينمات عادي؟ منطق غريب فعلاً يا حلا”.

وعبر بإستياء: “بعدين هو مش أنتي اللي مضيتي عقد وتقاضيتي عليه مبلغ كبير عشان الدور دا بعينه! هو مش إنتى اللى صورتيه ومثلتيه بنفسك وبمنتهى الرضا ولا حد أجبرك ؟! وللتوضيح للجمهور الكريم أنا والمخرجة الأستاذة سارة وفيق بعتنالك وكنا بنتحايل عليكى تيجى تشوفى شغلك قبل إصدار الفيلم عشان لو عندك أى ملحوظه تقوليها، ماكنتيش بتردى علينا وتليفوناتك كلها كانت بتقفل فى وشنا، إنتى للأسف يا حلا متعاملتيش صح مع الموقف كان لازم تهتمى بأمرك أكتر من كدا ولو كان ليكى أى طلب تانى كنت هعمله بكل حب إنما إنتى فجأة اختفيتى ومكملتيش تركيب صوتك فى الفيلم ولا جيتى تتصورى عشان آفيش الفيلم أصلًا ومخليتيناش نعرف نعمل آفيش مجمع! و بقيتى تقفلى تليفوناتك وتكنسلى علينا كلنا”.

واختتم حديثه قائلًا: “أنا زعلان منك جداً يا حلا على مفردات البوست بتاعك الغير موفقه ومستحيل هرد بطريقتك اللى فيها تجريح واتهامات باطلة ليا إحتراماً لحجات كتير يمكن فايتاكى بس مش هتفوتنى وعلى فكرة أنا واثق أنك عارفه أنى مستاهلش منك كدا وهكتفى بالتوضيح دا وربنا يهدى الجميع ويكتبلك كل الخير اللهم آمين”.